Qeveria hungareze u ka dërguar një urdhër televizioneve vendase për kufizimet që duhet të zbatojnë kur shfaqin filma me homoseksualë. Kufizimet janë të njëjta me ato që zbatohen për filma horror apo të dhunshëm.
Rregullorja e nxjerrë ditën e sotme nga Këshilli i Medias i Autoritetit Kombëtar të Mediave (NMHH), filmat që kanë tema LGBT+ (homoseksual, lezbike, biseksual, transgjinor dhe ndërseksualë) si dhe çështje të identitetit gjinor nuk do të “rekomandohen” për personat nën moshën 18-vjeç.
“Sjelljet e përgjithshme që shprehin butësinë, si një puthje në faqe, një përqafim, mbajtja e duarve gjatë ecjes ose një puthje nuk mund të konsiderohen problematike përveç se në rastet kur ato përbëjnë një element qendror të programit” – shkruhet në udhëzim.
Në muajin qershor Hungaria miratoi ligjin që ndalon “shfaqjen dhe promovimin e homoseksualitetit” për personat nën 18-vjeç dhe përgatitja e këtij ligji u bazua në ligjin e diskutueshëm të “propagandës homoseksuale” të miratuar nga Rusia më 2013.
Ky ligj është kritikuar nga organizata për të drejtat e njeriut, Human Rights Watch, duke thënë se ai rrit armiqësinë shoqërore ndaj homoseksualëve në Rusi dhe paraqet një “shembull klasik të homofobisë politike”.
Hungaria është përballur me kritika të ashpra për ligjin nga ana e Shteteve të Bashkuara dhe Bashkimit Evropian. Qeveria konservatore e kryeministrit Viktor Orban ka thënë se legjislacioni është i nevojshëm për të mbrojtur të drejtën e fëmijëve për identitetin e tyre gjinor të fituar në lindje.
