Operatori i Shpërndarjes së Energjisë dhe Operatori i Sistemit të Transmetimit kanë aplikuar pranë Entit Rregullator të Energjisë për rritje të çmimit vitin e ardhshëm dhe ky vendim ka hyrë tashmë në fuqi. Vendimi është publikuar sot në Fletoren Zyrtare dhe përcakton fillimin e procedurës së shqyrtimit të aplikimit për rritje çmimi nga dy kompanitë shtetërore të energjisë.
Përmes këtij vendimi, OSHEE kërkon një rritje të tarifës mesatare të shpërndarjes së energjisë me 34%. Pra, nga 4.79 lekë për kilovat orë që është sot, të bëhet 6.42 lekë për kilovat orë duke filluar nga viti i ardhshëm. Nga rritja e çmimit janë të përjashtuar qytetarët dhe bizneset e vogla, siç ishte deklaruar edhe më herët nga qeveria, teksa do të preken bizneset e mëdha, të lidhur në tensionin 6, 10 dhe 20 kilovolt, si dhe ato në tensionin 35 kilovolt, që janë kryesisht industritë. Burime nga OSHEE shpjegojnë se rritja e çmimit për këtë kategori është kërkuar për rregullim të tarifave në treg, të cilat për këto biznese ishin të pandryshuara prej vitesh, pavarësisht rritjes së kostove.
Discussion about this post