Kryetari i Organizatës së Veteranëve të Luftës së UÇK-së, Hysni Gucati, ka nisur protestën e zhvilluar sot në sheshin “Skënderbej” në Tiranë, duke ngritur zërin kundër, siç tha ai, padrejtësive që po u bëhen pesë krerëve të Ushtrisë Çlirimtare të Kosovës që ndodhen në paraburgimin e Hagës.
Në fjalën e tij para mijëra qytetarëve të mbledhur nga të gjitha trevat shqiptare, Gucati theksoi se kjo protestë nuk ka lidhje me politikën, por është një thirrje për drejtësi ndaj atyre që luftuan për lirinë e Kosovës.
“Ne sot po protestojmë për të ngritur zërin për drejtësi. Jemi këtu për të mbrojtur luftën e shenjtë të UÇK-së dhe gjakun që u derdh për liri. UÇK nuk ka nevojë të dëshmojë që ishte ushtri çlirimtare – këtë e ka dëshmuar historia dhe bota mbarë,” – deklaroi Gucati.
Ai shtoi se krimet e Serbisë janë të dokumentuara dhe të njohura ndërkombëtarisht, ndërsa proceset në Hagë po përdoren për të njollosur një luftë të drejtë.
“Gjykata Speciale ka humbur çdo besim të shqiptarëve. Proceset në Hagë janë të njëanshme dhe të padrejta. Drejtësia e vërtetë nuk ka frikë nga e vërteta,” – theksoi ai.
Duke vënë në dukje se Tirana është kryeqyteti i të gjithë shqiptarëve, Gucati tha se nuk do të lejojnë që të përdhoset emri i atyre që sakrifikuan për liri.
Protesta e sotme u organizua në mbështetje të Hashim Thaçit, Kadri Veselit, Jakup Krasniqit, Rexhep Selimit dhe Nasim Haradinajt, të cilët po gjykohen nga Gjykata Speciale në Hagë, me akuza për krime lufte.
Discussion about this post