GJKKO ka caktuar 14 shtatorin si datën e nisjes së gjykimit ndaj Fredi Belerit, kryebashkiakut të zgjedhur të Himarës, i arrestuar në 12 maj nga Policia me akuzën e shit blerjes së votave.
SPAK ka ngritur akuzën për korrupsion zgjedhor ndaj Belerit, ndërsa ky i fundit ka hedhur poshtë akuzat, duke i cilësuar si të sajuara dhe me politike.
Pritet që në 14 shtator Beleri, i shoqëruar nga dy avokatë, të jetë i pranishëm në sallën e gjyqit, ndërkohë që procesi gjyqësor, ashtu si edhe masat e sigurisë, pritet të monitorohen nga përfaqësues të ambasadës greke në Tiranë.
Beleri nuk ka arritur të marrë mandatin për shkak se nuk u lejua të kryejë betimin para këshillit Bashkiak, ashtu sikundër parashikohet nga ligji, ndërkohë që KQZ e ka njohur si fitues të zgjedhjeve të 14 majit për Bashkinë e Himarës.
Beleri u arrestua dy ditë para zgjedhjeve, ndërsa operacioni kundër tij u parapei nga një fushatë denigruese me akuza dhe fyerje të Kryeministrit Edi Rama ndaj kandidatit që garonte nën siglën e koalicionit “Bashkë Fitojmë”.
Beleri kërkoi dy herë leje për të bërë të mundur betimin si kryebashkiak por ajo i është refuzuar.
Arrestimi i Belerit është pasur me një tensionim të raporteve mes Athinës zyrtare dhe Qeverisë Rama. Greqia ka kërkuar nga autoritetet shqiptarë që të respektojnë shtetin ligjore dhe prezumimin e pafajësisë, në rastin e Belerit, ndërkohë që Edi Rama në reagimet e tij e ka cilësuar “një çështje në dorë të drejtësisë”.
Discussion about this post