I akuzuar për plagosje dhe pjesë e bandave kriminale, kërkohet arrestimi i “Darit të Elbasanit”

Prokuroria e Elbasanit ka kërkuar arrestimin e një prej emrave shumë të përfolur në botën e krimit në këtë qytet, Hajdar Bakos, i cili njihet shkurt me emrin “Dari i Elbasanit”.  Sipas informacioneve, prokuroria ka dorëzuar kërkesën për arrestimin e ti  në gjykatë ditën e sotme dhe pritet që në datën 17 janar 2022, gjyqtari Taulant Tafa, të vendosë ose jo miratimin e kërkesës së prokurorit për zëvendësimin e masës së dënimit, nga shërbim prove në vuajtjen e dënimit me burg.

Kjo do sillte dhe nxjerrjen më pas të një urdhri arresti ndërkombëtar, për Hajdar Bakon, i cili bën një jetë mes Spanjës, Italisë dhe Dubait në Emiratet e Bashkuara Arabe. Sipas burimeve, mësohet se Hajdar Bako, prej 11 muaj me radhë i është shmangur detyrimit ligjor, për të mbajtur kontakt me shërbimin e provës në Elbasan.

 Kjo pasi në vitin 2017, me kërkesë të prokurorit, Xhelian Seferi, Bako u dënua me 4 vite burgim për “Plagosje të rëndë me dashje” në dëm të Klevis Gjinit, ngjarje kjo e ndodhur në 7 prill 2017 në ambjentet e restorant “Dervishaj”. Veç kësaj akuze, Bako u dënua dhe për “Mbajtje pa lejë të armëve”.

Kush është Hajdar Bako

Hajdar Bako njihet në Elbasan dhe me mbiemrat Çopja dhe Hysa. Ndërsa së bashku me dy vëllezërit e tij, Franc Bako alias Çopja dhe Ervin Bako alias Çopja, ka dyshime të forta se drejtojnë një grup kriminal që ka si aktivitet trafikimin e lëndëve narkotike në disa shtete të Europës. Bako thirret ndryshe si “Dari i Elbasanit”, ndërsa jeton në Dubai, ku vizitën e fundit në Shqipëri e ka pasur në 6 shkurt 2021.

Sipas dosjes hetimore Hajdar Bako, rezulton i dënuar pasi në 7 prill 2017, si pasojë e një shkëmbimi zjarri ka plagosur rëndë, Klevis Gjinin. Të dyja palët kanë qënë të armatosur dhe në total është qëlluar 16 plumba me pistoletë në ambjentet e restorant “Dervishaj”. Në këtë përplasje me armë, Hajdar Bako alias Copja ka qënë i shoqëruar me vëllain e tij, Franc Copja. Të dy së bashku janë konfliktuar dhe dy vëllezërit Klevis dhe Alfred Gjini si dhe me djalin e xhaxhait të tyre, Emiljano Gjini.

Fillimisht mes pesë persona ka nisur një konflikt verbal, më pas ka vijuar me goditje fizike, duke u pasuar me përdorimin e armëve. Si pasojë e kësaj përleshje fizike dhe me armë, kanë mbetur të plagosur Klevis Gjini, Hajdar Bako dhe Emiljano Gjini. Klevisi është arrestuar nga prokuroria për akuzën e “Plagosjes së rëndë me dashje” ndaj Hajdar Bakos, ndërsa ky i fundit është arrestuar për plagosjen e rëndë ndaj Klevis Gjinit