Shaqir Nikolli është arrestuar nga policia braziliane, teksa akuzohet për vrasjen e ndodhur në Dibër në vitin 1996.Nikolli gjithashtu akuzohet dhe për trafik ndërkombëtar droge.
Mediat braziliane raportojnë se në 20.10 policia ka arrestuar një shtetas shqiptar i cili është pjesëtar i një organizate kriminale të dedikuar për trafikun ndërkombëtar të drogës.
Ai është dënuar me 10 vite burg në Francë, teksa kërkohej dhe në Maqedoninë e Veriut.
Shaqir Nikolli do të qëndrojë në dispozicion të Gjykatës së Lartë të Brazilit, në pritje të nisjes së procesit të ekstradimit.
Shqiptari nga Dibra akuzohet për vrasjen e dy personave gjatë grabitjes së një autobusi në vitin 1996. Në vitin 2002 ai u arrestua në Vjen, Austri me qëllim ekstradimi drejt vendit tonë.
Hektor (Shaqir) Xheladin Nikolli është arrestuar dhe në vitin 2011 në Austri falë bashkëpunimit të Interpol Tiranës me Interpol Vienën, me qëllim ekstradimin e tij drejt Shqipërisë.
Gjykata e Shkallës së Parë në Dibër kishte dhënë masën e sigurisë arrest me burg për Hektor Nikollin në 27.10.2009, për veprën penale të vjedhjes me pasojë vdekjen e personave të tjerë. Ai ishte shpallur në kërkim ndërkombëtar nga Interpol Tirana, më datë 23.02.2010.
Në vitin 1996 katër persona të armatosur kanë qëlluar me armë zjarri në drejtim të autobusit të linjës Peshkopi-Reç, që drejtohej nga shtetasi Rasim Elezi. Mes tyre ishte dhe personi që tashmë është arrestuar pas 25 vitesh, pikërisht Shaqir(Hektor) Nikolli.
