I akuzuar për vrasjen e ish-agjentit të Antidrogës, arrestohet pas 15 vitesh në Londër/ Detajet

Një 34-vjeçar i akuzuar për vrasje me paramendim u arrestua në Mbretërinë e Bashkuar në kuadër të operacionit të koduar “Capital”. Gjatë këtij operacioni, në bazë të informacionit të siguruar nga inteligjenca e Policisë së Shtetit, për vendndodhjen e një shtetasi në kërkim ndërkombëtar që fshihej në Londër, është kapur në kohë rekord në Londër dhe është arrestuar me qëllim ekstradimin drejt Shqipërisë, shtetasi Donald Hoxha, 34 vjeç.

Ky shtetas ishte shpallur në kërkim ndërkombëtar nga Interpol Tirana, pasi Gjykata e Shkallës së Parë e Juridiksionit të Përgjithshëm Elbasan i ka caktuar masën e sigurisë “Arrest në burg”, për veprat penale “Vrasja me paramendim” dhe “Mbajtja pa leje dhe prodhimi i armëve, armëve luftarake dhe municionit”.

Shtetasi Donald Hoxha akuzohet si njëri nga autorët e vrasjes së shtetasit R. R., ngjarje e ndodhur më datë 22.07.2009, në Elbasan.

Interpol Tirana, në bashkëpunim me Interpol Mançester, Mbretëri e Bashkuar, po kryen procedurat për ekstradimin e shtetasit Donald Hoxha, në Shqipëri.

Ngjarja

Krimi për të cilin u arrestua Donald Hoxha ka ndodhur më 29 korrik 2009 në lagjen Vullnetari në Elbasan. Hoxha akuzohet si pjesë e një grupi që ekzekutoi Roland Rexhepin, ish-punonjësi i Antidrogës në Drejtorinë e Policisë Elbasan. Ai u qëllua me disa plumba sapo doli nga pallati ku jetonte.

Si ekzekutor për vrasjen e Rexhepit u arrestua Armando Llakaj. Nga hetimet rezultoi se krimi ndodhi si rezulat i përplasjes mes grupit të Çapjave dhe familjes Mema në Elbasan.

Krahas Llakajt, me urdhër të prokurorisë u arrestua edhe Marjus Tafa.

Të dy këta persona konsideroheshin në 2009 si njerëz të afërm të familjes Çapja, ndërsa tashmë janë dënuar me 24 dhe 23 vite burgim, ku vijojnë të vuajnë dënimin në burgun e Peqinit.

Ndërkohë, pas 12 vite nga kjo ngjarje Prokuroria ka mundur të identifikojë dhe t’i komunikojë arrestin Florind Shabanit, njërit nga bashkëpunëtorët në këtë vrasje. Identifikimi i Shabanit është kryer duke analizuar një profil AND-je që është gjendur në një kapuç dhe një bisht cigare. Ky profil ka dalë i njëjtë me atë që ka dhe Florind Shabani.

Ndërsa sot në Londër është arrestuar edhe Hoxha, i cili ka bashkëpunuar në vrasjen e Rexhepit.