Cristiano Ronaldo arriti dje një rekord historik. Sulmuesi i Juventusit i shënoi dy gola Francës dhe e çoi në 109, numrin e rrjetave me kombëtaren, duke barazuar Ali Daei, ish-sulmuesin e Iranit, si lojtarët me më shumë gola për kombëtaret e tyre ne histori.
Pas rekordit nuk ka munguar as përgëzimi i Daei, që ka fjalë të ngrohta për Ronaldon. “Urimë Cristiano! Jam i nderuar që ky rekord historik është arritur nga një kampion i madh brenda dhe jashtë fushës”, shkruan Daei.
Menjëherë më pas Ronaldo i është përgjigjur, Daei me të njëjtën dashamirësi. “Kampionët e vërtetë mbeten të tillë përgjithmonë. Krenar që dëgjoj këto fjalë nga një idhull si ty. Faleminderit Ali Daei!”, -shkruan Ronaldo.
Për Ronaldon nuk ka munguar as përgëzimi nga legjenda e futbollit, Pelle. “Ronaldo urime për një tjetër rekord. Unë po brohoras për ty”, -shkruan legjenda e futbollit brazilian dhe botëror. Pas pak ditësh Ronaldo sfidon Belgjikën dhe do provojë ta thyejë ndaj tyre rekordin.
