Deputeti i Partisë Demokratike, Belind Këlliçi, dhe njëherësh kryetari ende në detyrë i Foumit Rinor të PD, ka konfirmuar praninë e tij në foltoren e ish-kryeministrit Sali Berisha që mbahet sot në amfiteatrin e jashtëm të Akademisë së Arteve.
Këlliçi zbulon përmes një postimi në Facebook arsyet e vendimit, ndërsa shton se çdo anëtar i PD-së duhet të dëgjohet edhe kur kritikon.
“Unë kam folur gjithnjë me gjuhën e gjithëpërfshirjes. Jam kundër përjashtimit e linçimit publik që i bëhet bashkëdemokratëve të mendimit ndryshe. Çdo anëtar i FRPD gëzon lirinë të zgjedhë platformën ku mund të shprehë qëndrimet e veta. Unë jam pjesë e PD sepse besoj në historinë dhe potencialin tonë për të qeverisur Shqipërinë. Mandati im nuk është i përjetshëm. Anëtarët e kryesisë së FRPD nuk janë uzurpatorë dhe as të ngujuar. Zyrat tona janë aty ku kanë qenë, në selinë e PD, për këdo që kërkon të njohë të rinjtë e saj”, shkruan ai.
Por, duket se vendimi për t’iu shtuar listës së deputetëve që i është bashkuar “Foltores” së ish-kryeministrit Berisha, është dhe shkaku real për shpalljen e zgjedhjeve për kreun e ri të FRPD-së.
“Kam njoftuar pjesëmarrjen në Foltore, sepse besoj se anëtarësia duhet dëgjuar kur na kritikon. Prandaj sot, në orën 12:00, në amfiteatrin e jashtëm të Akademisë së Arteve, do të jem edhe unë, për të dëgjuar këdo që nuk ka pasur hapësirë të shprehet e të dëgjohet”, shkruan deputeti.
Partia Demokratike njoftoi disa ditë më parë se Forumi Rinor ka nisur procesin e riorganizimit dhe zgjedhjeve në të gjitha strukturat me justifikimin se kryetarit aktual i ka mbaruar mandati.
Discussion about this post