I ati i 14-vjeçarit të plagosur ditën e sotme gjatë sherrit që ndodhi pranë shkollës “Fan Noli” në kryeqytet ka treguar përjetimin e të birit dhe atë që është zbuluar deri tani nga ai.
Ai tregoi se djali i tij është tashmë në gjendje shumë të mirë dhe ka kaluar momentin e vështirë pas plagëve të marra. Sipas tij 14-vjeçari është goditur 4 herë me thikë në trup, në pjesën e parakrahut, në shpatull dhe në ije.
Po ashtu ai ka patur hemorragji të brendshme, por gjendja tashmë është e stabilizuar. “Për momentin djali është në gjendje shume të mirë, e ka kaluar pjesën e shokut dhe mori ndihmën e parë nga spitali. Tani doli edhe nga salla dhe është mirë. Ka kryer një ndërhyrje, i kanë vënë një tub që të nxjerrë gjakun nga mushkëria sepse kishte hemorragji të brendshme. Djali ka 4 goditje, një në parakrah, një në shpatull dhe dy në ije. Mjekët thanë se nuk është në rrezik për jetën”, u shpreh ai.
Sipas tij i biri kishte shkuar te shkolla “Fan Noli” pasi ishte thirrur nga viktima, i cili ishte shoku i tij i ngushtë.
Babai tregoi më tej se në momentin që djali ka arritur atje dy persona i kanë goditur me thika, 14-vjeçarin e plagosur dhe viktimën.
Ai zbuloi se sherri ka nisur ditën e premte, kur viktima dhe një ish-shok i tij, po ashtu në shkollën “Fan Noli” janë konfliktuar në oborr, ndaj edhe kishin lënë një takim ditën e sotme.
Sipas dëshmisë së tij, me viktimën dhe djalin e plagosur ishte edhe një adoleshent tjetër, i cili nuk është dëmtuar dhe po jep dëshminë e tij në komisariatin e policisë.
“Fola me djalin pak dhe më tha se shkoi te shkolla Fan Noli të takonte një shok sepse ai kishte një problem me një shok të klasës që e ka goditur. Në momentin që arriti te shkolla dy personat që ishin atje i kanë goditur me thika djalin tim dhe viktimën. Nuk e di pse janë konfliktuar. Ish-shoku i viktimës e ka goditur ditën e premte në oborrin e shkollës, kaq di deri tani. Ditën e sotme u goditën me thika. Djali më tha se ishin dy veta me thika dhe pjesa tjetër që ishin më shumë vetë janë larguar pasi panë thikat. Ata janë kapur në befasi dhe janë goditur më pas.
Nuk i kemi treguar për gjendjen e shokut të tij, kishte 7 vite që rrinte me të dhe nuk duam ta stresojmë duke i treguar. Djali tjetër është te drejtoria e policisë duke dëshmuar. Kemi folur me familjarët e fëmijëve të tjerë”, tregoi ai.
gijotina.com/
Discussion about this post