I cilësoi njollë turpi, reagon Këlliçi: Ramës i duhen prokurorë e gjykatës si Irena Gjoka

Deputeti I partisë Demokratike Belind Këlliçi ka reaguar gjatë ditës së sotme pas deklaratave shantazhuese të Ramës për rrogat e gjyqtarëve.

“Ai ka nisur luftën me gjykatësit dhe po bën gjithçka për të njollosur figurën e tyre, qysh se u morën vendime për Veliajn, për Beqen, për 5D, për Mirlindën, për Gysin, për Ballukun e shumë shpejt dhe për atë vetë”.

“Edi Ramës i duhen vetëm prokurorë e gjykatës si Irena Gjoka”, shkruan Këlliçi në një postim të tij në facebook.

Mesazhi:

Propagandë e skaduar me armiqtë e pensionistëve e mësuesve!

Edi Rama ka zbuluar sot se gjykatësit e paskan fajin për pensionet e ulëta dhe për pagat e parritura të mësuesve. Në stilin e përhershëm për të gjetur fajtorë për dështimet e tij, ai ka vënë në shënjestër tanimë gjykatësit që kanë kërkuar rritje page.

Le të marrim vetëm rastin e fundit për të cilin bashkëpunëtorja e tij më e ngushtë, Belinda Balluku është zyrtarisht e pandehur për abuzim. Bëhet fjalë për 11 tendera me vlerë 1.1 miliardë euro.

Sigurisht se këtu ka dorë vetë Edi Rama pasi ai e pranoi që lë porosi se kush duhet t’i marrë paratë.

Ja ku janë fondet që do të mjaftonin për rritjen e pensioneve dhe pagave të mësuesve. Eshtë me prova e me fakte se kanë abuzuar me 11 procedura, me vlerë 1.1 miliardë euro.

Nuk po përmendim këtu 400 milionë euro që janë bërë plaçkë te AKSHI.

Edi Ramës nuk i dhimbsen fare paratë e taksapaguesve. Po të ishte kështu, ai nuk do të merrte prej tyre mbi 4 milionë euro për të ndërtuar kopshtin privat në kryeministri, që e shfrytëzon për të dhënë intervista.

Ai ka nisur luftën me gjykatësit dhe po bën gjithçka për të njollosur figurën e tyre, qysh se u morën vendime për Veliajn, për Beqen, për 5D, për Mirlindën, për Gysin, për Ballukun e shumë shpejt dhe për atë vetë.

Edi Ramës i duhen vetëm prokurorë e gjykatës si Irena Gjoka.

Kush nuk është nën urdhërat e tij, duhet sulmuar.

Këto marifete të dala boje as nuk i japin kohë, as nuk e shpëtojnë nga pika më e ulët ku ndodhet pas 13 viteve. As fermeri nuk mashtrohet më me armiqtë imagjinarë, as pensionisti, as tregtari, as mësuesi, askush tjetër.

Protesta që zien kudo po e tregon se propaganda e Edi Ramës ka skaduar bashkë me atë vetë.

Mblidhemi të vendosur me 10 shkurt në Bulevard për t’i treguar vendin këtij Kryeministri të korruptuar e të lidhur me krimin.