Policia e Tiranës ka vënë në pranga dy persona pasi lëviznin të armatosur dhe mbanin lëndë narkotike me vete. Sipas njoftimit të policisë, arrestimet janë kryer në bazë të operacionit ‘Similar’ ku në pranga kanë rënë Armand Rika dhe Juxhin Gjon Bocari.
Bocari nuk është një emër i panjohur për policinë pasi ka qenë i dënuar më parë për vrasje të mbetur në tentativë, përndjekje dhe prodhim dhe shitje narkotikësh.
Gjatë kontrollit të banesës së Rikës në rrugën “Jaho Gjoliku”, u gjetën sasi municioni luftarak, sasi lënde e dyshuar narkotike e llojit kokainë e ndarë në doza, pajisje që shërbejnë për kultivimin e bimëve narkotike dhe dy peshore elektronike, të cilat u sekuestruan në cilësinë e provës materiale, së bashku me armën e zjarrit pistoletë dhe automjetin.
Materialet procedurale i kaluan Prokurorisë pranë Gjykatës së Shkallës së Parë Tiranë, për veprime të mëtejshme.
Discussion about this post