Katër inspektorë policie janë pezulluar në Durrës. Mësohet se ata kanë qenë me shërbim, kur është larguar nga banesa e tij në fshatin Gjuricaj, Afrim Kila për të cilin Gjykata e Apelit, ka caktuar masën e sigurisë “Arrest në shtëpi”, për veprën penale “Vrasja me dashje”.
39-vjeçari është larguar nga ambientet e banesës që ndodhet në zonën e Manzës, menjëherë sapo Gjykata e Apelit të Juridiksionit të Përgjithshëm, e ka cilësuar fajtor për akuzën e vrasjes dhe e ka dënuar me 16 vite burg.
Kila është dënuar për vrasjen me dashje të ndodhur në vitin 2020 në një lokal në Ishëm. Ai u lirua në arrest shtëpie për shkak se skaduan afatet e paraburgimit, edhe pse ishte dënuar 18 vite nga Gjykata. Fillimisht u dyshua se ngjarja ishte aksidentale, pasi personi ishte përplasur me makinë, por më pas u zbulua se Kila kishte goditur me sende të forta dhe më pas e ka vrarë duke e goditur me automjet.
Njoftimi i policisë:
Drejtoria e Standardeve Profesionale e Policisë së Shtetit ka pezulluar nga detyra, për shkelje të pikës 5 të nenit 209 të rregullores së Policisë së Shtetit, punonjësit e Policisë:
-Inspektorë B. V., K. D. dhe O. Sh., të tre oficerë të Patrullës së Përgjithshme të Komisariatit të Policisë Durrës;
-Inspektor S. K., trupë shërbimi në Stacionin e Policisë Manzë.
4 punonjësit e Policisë janë pezulluar nga detyrat, pasi kanë qenë me shërbim, kur është larguar nga banesa e tij në fshatin Gjuricaj, shtetasi A. K., për të cilin Gjykata e Apelit, Tiranë, ka caktuar masën e sigurisë “Arrest në shtëpi”, për veprën penale “Vrasja me dashje”.
Ndërkohë, AMP-ja ka iniciuar hetim penal për këtë rast dhe në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Durrës, vijon puna për zbardhjen e rrethanave dhe përcaktimin ligjor të përgjegjësive.
Discussion about this post