Në 16 tetor në Tiranë mbahet Samiti në kuadër të Procesit të Berlinit, ndërkohë që sot u mbajt Ministeriali i ministrave të Jashtëm të vendeve të përfshira në këtë proces.
Lidhur me procesin e zgjerimit të Bashkimit Europian dhe sfidave me të cilat përballen vendet e Ballkanit Perëndimor, në podcasting e radhës “Public Square”, Ditmir Bushati, bisedoi me Manuel Sarrazin, Përfaqësues i Posaçëm i qeverisë gjermane për vendet e Ballkanit Perëndimor.
Ai u pyet nëse vendimi për të organizuar konferencën e Berlinit në Tiranë është një shprehje vullneti se e ardhmja e rajonit tonë është në BE?
Por Sarrazin tha se rezultatet e takimit janë më të rëndësishme sesa vendi i mbajtjes së takimit.
Ai zbuloi se me mbajtjen e takimit në Tiranë synohet të jepet mesazhi se rajoni është në pozitë të barabartë në Procesin e Berlinit.
“Ideja është për të dhënë mesazhin se rajoni është në pozitë të barabartë në Procesin e Berlinit. Kjo është ideja.
Ne duhet t’i qëndrojmë vullnetit politik dhe Gjermania po përpiqet të injektojë një fluks të vullnetit politik edhe në rajon me qëllimin shtimin e reagimit për më shumë shpejtësi politike. Për ne nuk ka të bëjë vetëm me hapjen e kapitujve dhe çeljen e negociatave, posaçërisht për Shqipërinë edhe Maqedoninë e Veriut.
Angazhimi ynë është për një vullnet të fortë politik dhe për rezultate konkrete”, thekson Përfaqësuesi i Posaçëm i qeverisë gjermane për vendet e Ballkanit Perëndimor, Manuel Sarrazin.
Për Manuel Sarrazin, Procesi i Berlinit ka dhënë disa rezultate konkrete për vendet e Ballkanit Perëndimor edhe pse ato shpeshhere nënvleftësohen.
“Ka një shans historik për të parë më në fund se Procesi i Berlinit mund të jetë një instrument mjaft i fuqishëm në drejtim të kontributit për perspektivën europiane. Por le ta themi edhe në këtë mënyrë, për rolin e institucioneve europiane dhe sundimit të ligjit në Ballkanin Perëndimor. Në këtë ndryshim historik që po vjen tashmë me Ukrainën dhe Moldavinë, zgjerimi rivjen në skenë si instrumenti më i fuqishëm i politikës së jashtme që ka BE-ja.
Meqë ra fjala, është pa mëdyshje në duart e Komisionit sipas procedurës, jo sipas vendimeve, për shkak të situatës në Këshill. Pra, është një shans historik posaçërisht për Gjermaninë dhe vendet e Procesit të Berlinit në përgjithësi për t’i dhënë një shtytje tjetër dhe një fluks tjetër idesh këtij procesi”, tha Sarrazin.
Discussion about this post