I dyshuar si një nga organizatorët dhe porositësit e vrasjes së shtetasit Behar Sofia, në GJKKO pritet të nisë të hënën gjykimi ndaj Jemin Sherës.
Edhe pse Shera nuk është arrestuar, gjyqi do të zhvillohet në mungesë, për vrasjen e 25 shkurtit 2021 që tronditi në atë kohë Tiranën.
SPAK ka ngritur akuzat ndaj Sherës, nga pjesëmarrje në grup kriminal te vrasja me paramendim e Behar Sofias, raporton TV Klan.
SPAK shkoi drejt identifikimit të shtetasit Jemin Shera, si një nga organizatorët e kësaj ngjarje, nga disa pamje të kamerave të sigurisë, ku ai qëndronte para vrasjes me shtetasin tjetër të konsideruar organizator, Skënder Vathin.
Sipas raportimeve, që i referohen të dhënave që kreu Policia dhe grupi hetimor lidhur me vrasjen e Behar Sofisë, Jemin Sheraj, në orën 08.27, ishte në një një tavolinë me Skënder Vathin.
Kamerat tregojnë se gati dhjetë minuta pas takimit, rreth orës 08.38 ky person duket se i jep diçka Vathit i prezantuar “dajo” që sipas përshkrimit të hetuesve, në dukje është një letër. Ai më pas largohet nga lokali.
Vathi po gjykohet bashkë me 3 persona të tjerë të arrestuar, të cilët akuzohen se ndihmuan Ernejt Shytin të kryente ekzekutimin në zonën pranë Piramidës.
Shyti, pas identifikimit vendosi të bashkëpunojë me drejtësinë dhe tregoi se si për vrasjen e ndodhur iu premtuan 50 milionë Lekë, por që nuk arriti t’i merrte.
Në procesin, i cili po zhvillohet në Gjykatën e Posaçme, Shyti rrëfeu për trupin gjykues se si kishte nisur plani për ekzekutimin e Sofisë pas kërkesës së bërë nga shtetasi Xhulio Visha.
Viktima u ndoq për disa ditë në itinerarin e lëvizjeve që bënte dhe gjatë kësaj kohe, Shyti bënte prova me armën e zjarrit, pasi nuk e kishte përdorur me parë.
Ernejt Shyti gjithashtu ka treguar se të njëjtët persona të akuzuar në këtë vrasje, kishin në plan të kryenin edhe ngjarje të tjera me pagesë.
Discussion about this post