Kryeministri Edi Rama i është përgjigjur akuzave të Sali Berishës për Engjell Agaçin, i cili ka deklaruar se është arratisur, madje i kanë sekuestruar edhe laptopin.
Sipas Ramës, këto janë shpifje, ndërsa theksoi se Agaçi ndodhet nën kujdesin e mjekëve në Itali dhe është në gjendje të rëndë shëndetësore që siç shprehet ai “kaloi tehun mes jetës dhe vdekjes”.
“Këneta ka marrë peng Engjell Agacin, gruan, vajzën, nënën e tij të mrekullishëm, familjen, me ferman të bufit që e shpalli një person në arrati nga drejtësia. Me tam tamet e mushkonjave të kënetës që hodhën helmin e zëvendësimit të tij, e dyndjes së hetuesve të SPAK në kryeministri e marrjes së lap topit dhe e syrit që tu dali bashkë me syrin e bufit. Para disa kohësh u nis në Itali për arsye shëndetësore, kaloi tehun mes jetës dhe vdekjes. Si pasojë e bllokimit të arterieve koronare, për të cilën u operua ne zemër. Pas operacionit pati një dalje të mushkërive nga funksione, gjë që detyroi futjen në aparaturën e frymëmarrjes së drejtuar. Pas një periudhe të vështirë në reanimacion, ai vazhdon të jetë nën mbikëqyrjen e tyre për të rehabilituar mushkëritë e dëmtuara rëndë”, tha Rama në një postim në FB.
Deklaratës së Ramës, Berisha iu përgjigj në një konferencë për mediat, duke thënë se nëse versioni i Ramës do të ishte i vërtetë atëherë, pse nuk publikohet të dhënat e spitalit ku Agaçi është mjekuar.
“Nuk tregoi as spital, as klinikë, përkundrazi nga Roma vijnë fotografi në kafene. Po të ishte se është e vërtetë tregon spitalin, klinikën”, tha Berisha, i cili i qëndroi deklaratës se lap-topi i Agaçit është sekuestruar.
Discussion about this post