Ka përfunduar seanca në Gjykatën e Apelit ndaj ish-deputetit të Partisë Socialiste, Alqi Bllakos.
Bllako, përmes avokatit të tij mbrojtës, kërkoi masë më të butë sigurie. Apeli ka vendosur ta lërë në burg.
Ish-deputeti i PS-së akuzohet se ka përfituar afro 14 milion e 600 mijë lekë pasi ka falsifikuar dokumente për të shpronësuar një tokë për ta kthyer nga një tokë arë në truall në bashkëpunim me ish-ministrin e Mjedisit Lefter Koka e kryetarin e shpronësimeve, Pëllumb Abeshi. Koka ndodhet pas hekurave për këtë çështje prej më shumë se dy muajsh.
Bllako mohon akuzat
Ndërkohë, pak kohë më parë ish-deputeti i Partisë Socialiste, Alqi Bllako, për gati 2 orë ka dhënë dje deklaratën e tij përballë prokurorit të çështjes. Ai ka sqaruar të gjithë rolin e tij në dhënien me koncesionin inceneratorin e Fierit. Bllako ka mohuar akuzat dhe pretendimet e SPAK si i përfshirë në këtë aferë. Sipas Bllakos, për sa i përket akuzës së shpërdorimit të detyrës për shpronësimin e vendit ku u ndërtua inceneratori, tha se nuk ka pasur funksion vendimmarrje. Sipas tij, procedura është kryer dhe është ndjekur nga komisioni i ngritur për këtë çështje në Ministrinë e Mjedisit. Ai deklaroi se ka pasur detyrë vetëm t’ja përcjellë shkresën Këshillit të Ministrave për miratim. Përsa i përket akuzës së korrupsionit për punësimin e babait të tij në mënyrë fiktive në inceneratorin e Tiranës, Bllako është shprehur se kontrata për punësimin e babait të tij nuk është firmosur nga Klodian Zoto, por nga ana e administratorit italian.
Discussion about this post