Komisioni i Pavarur i Kualifikimit ka shkarkuar sot shkarkon nga detyra gjyqtarin e Elbasan, Bujar Musta. Sipas vendimit të komisionit, Musta nuk mundi të justifikonte pasurinë edhe pas provave shtesë që solli. Nga analiza financiare e kryer në KPK, Musta ka rezultuar në pamundësi financiare për krijimin e kursimeve në fund të vitit 2009, pasi është konstatuar balancë negative fondesh në shumën 1.4 milionë lekë. Ndërsa për apartamentin e blerë në 2010-ën është konstatuar pamundësi financiare në vlerën rreth 1.8 milionë lekë.
Sipas KPK, subjekti ka deklaruar se nga shtatori i vitit 2007 deri në 2010-ën kur është formalizuar kontrata e shitblerjes së apartamentit, ka jetuar në këtë banesë pa kundërshpërblim. Ai ka shpjeguar se shitësi i apartamentit është kushëri i gradës së dytë me bashkëshorten dhe se janë dakordësuar për të jetuar aty pa kundërshpërblim. Trupa Gjykuese e përbërë nga Olsi Komici, Suela Zhegu, Lulzim Hamitaj pasi analizoi provat dhe fakte vendosi shkarkimin nga detyra e subjektit të rivlerësimit Bujar Musta, gjyqtar pranë Gjykatës së Rrethit Gjyqësor Elbasan.
Bujar Musta e ka nisur karrierën në sistemin e drejtësisë në vitin 1993 dhe punon prej më shumë se dy dekadash si gjyqtar në Gjykatën e Rrethit Elbasan. Në vitin 2014, Musta i është nënshtruar një procedimi disiplinor dhe ka marrë “vërejtje me paralajmërim” nga Këshilli i Lartë i Drejtësisë.
E.H/ gijotina.com/
