Qeveria miraton projektligjin për kontrollin e kultivimit dhe përpunimit të bimës së kanabisit për qëllime mjekësore dhe industriale.
Ky projektligj pritet ti hapë rrugën legalizimit të kanabisit për qëllime mjekësore, nismë kjo e paralajmëruar nga Kryeministri Edi Rama muaj më parë. Nuk dihet ende se cilin model do aplikohet nga qeveria Rama përsa i takon kësaj çështjeje, por mund të aplikohet modeli maqedonas, ku kultivimi i kanabisit për qëllime mjekësore kryhet nga kompani të liçensuara në këtë fushë.
Ministrja e Shëndetësisë, Ogerta Manastirliu, njoftoi se propozimi i projektligjit u mor edhe pas konsultimit me qytetarët, ku 61% e tyre u shprehën pro lejimit të kultivimit të kanabisit mjekësor.
Manastirliu bëri me dije se Ministritë që kanë propozuar projektligjin kanë nisur nga puna për inicimin e procesit dhe përcaktimin e rregullave për menaxhimin e duhur të kësaj veprimtarie industriale.
“Qeveria ka miratuar projektligjin për kontrollin e kultivimit dhe përpunimit të bimës së kanabisit dhe prodhimit të nën produkteve të saj për qëllime mjekësore dhe industriale. Nga këshillimi kombëtar ku 61% e qytetarëve ju përgjigjën pozitivisht kësaj pyetje për inicimin e kësaj nisme ka filluar puna nga disa ministri. Ky projektligj që është propozuar nga Ministria e Shëndetësisë dhe Mbrojtjes Sociale, Ministria e Bujqësisë dhe Zhvillimit Rural dhe Ministria e Brendshme përcakton të gjithë kuadrin rregullator të mënyrës si do iniciohet procesi për kontrollin e kultivimit dhe përpunimit të kanabisit vetëm për qëllime mjekësore”, tha Manastirliu.
Discussion about this post