Ballkani i ka dhënë fund aventurës së vet në UEFA Champions League, në mënyrën më të keqe të mundshme.
Kampionët e Kosovës, udhëtuan drejt qytetit bullgar të Razgradit, për duelin ndaj Ludogorets, me avantazhin e dy golave të akumuluar nga ndeshja e parë.
Takimi i kthimit ama, që pritej të ishte një administrim avantazhi, për një ekip që tregoi nivel të lartë loje, në ndeshjen e zhvilluar në “Fadil Vokri”, u transformua menjëherë në një makth të vërtetë.
Vendasit zhbllokuan shifrat, menjëherë, duke ngushtuar diferencat në rezultatin e përgjithshëm, pas vetëm 4 minutash lojë, me Tekpetey që dërgoi topin në rrjetë pas gabimeve në mbrojtjen kosovare.
Ballkani mesa duket e mori këtë ndeshje shumë lehtshëm, duke treguar një fodullëk të pashoqë.
Në fund të pjesës së parë, erdhi dhe barazimi i rezultatit global, me Tekpetey, që ndëshkoi përsëri ekipin nga Suhareka.
Me rezultatin 2-0, u mbyllën 45 minutat e para të lojës. Në pjesën e dytë, u kompletua dhe “degjenerimi”, me Tissera që realizoi golin e tretë për Ludogorets, në minutën e 49’. Tashmë të kualifikuar, bullgarët e administruan më mirë avantazhin, me Ballkanin që tashmë, ishte i detyruar për të shënuar, për të dërguar takimin në shtesë.
Gjithçka e kotë, sepse djemtë e Dajës, pësuan dhe golin e katërt, në minutën e 78’, me Caio Vidal, që në një aksion model, mposhti portierin e Ballkanit.
Nga ky moment e deri në fund, nuk pati më histori, me Ludogorets, që siguroi kualifikimin për në raundin tjetër, ndërsa Ballkani i Ilir Dajës, do të ngushëllohet me turin e dytë të Conference League./m.b /gijotina.com
Discussion about this post