“I kam gati emrat”, Manja paralajmëron: Do ketë të tjerë të dënuar që do të futen në’41-biss’

Në një konferencë për mediat, ministri i Drejtësisë, Ulsi Manja, ka paralajmëruar sot se do të ketë të tjerë të dënuar që do të futen në regjimin e posaçëm ’41-biss’. Manja tha se masat do të ashpërsohen  dhe se ai ka gati emrat e tyre që të kalojnë në  regjimin e “burgut të egër”. “Lidhur me trajtimin e rasteve të tjera që kanë të bëjnë me regjimin e posaçëm 41-biss, nuk është një proces i stopuar, shumë shpejt do kemi rastet e tjera të vendosjes në këtë regjim të posaçëm dhe do bëhen publike. Në tavolinën time ka raste konkrete, të personave me rrezikshmëri kriminale dhe që në vlerësimin paraprak plotësojnë kushtet për t’u vendosur në këtë regjim të posaçëm”, tha Manja.

Sakaq, Manja tha se masat do të ashpërsohen për çdo lloj kategori nuk do të ketë më tolerim, kriminelët do të paguajnë për veprimet e tyre. Sipas tij, do bëhet ndërhyrje e menjëhershme që të ndërpriten kontaktet e tyre me jashtë.