Në Gjykatën e Shkallës së Parë të Juridiksionit të Përgjithshëm Elbasan është zhvilluar seanca ndaj Dritan Dajtit, i cili kërkon verifikimin e përfundimit të dënimit me 25 vite burg. Gjatë seancës sotme, përfaqësuesja e zyrës juridike të IEVP Peqin ka raportuar në Gjykatë për kohën e vuajtjes së dënimit nga Dritan Dajti.
“I kemi dërguar shkresë Drejtorisë së Përgjithshme të Burgjeve dhe Ministrisë së Drejtësisë për të na ndihmuar për përllogaritjen e kohës së dënimit, pasi kanë ndryshuar disa vendime dhe për ne është bërë e vështirë përllogaritja e saktë e përllogaritjes së viteve të dënimit”, tha ajo.
Në këto kushte, IEVP Peqin nuk ka bërë përllogaritje për Dritan Dajtin, as për periudhën e para daljes së vendimit të Gjykatës së Lartë.
Dritan Dajti në reagimin e tij pyeti “si është e mundur që IEVP nuk përllogarit vitet e vuajtura”, duke shtuar se “IEVP Peqin po merr atributet për të llogaritur vendimet e gjykatave që nuk është kompetencë e saj”.
Në këtë seancë nuk është i pranishëm prokurori Neritan Hoxha i larguar nga Veting, por prokuroria përfaqësohet nga prokurorja Glenda Zeneli.
Ndërkohë nuk është pranuar kërkesa e mbrojtjes për përjashtimin e trupit gjykues të kryesuar nga Magjistratja Suela Lika .
Sipas përfaqësuesve të tij ligjor, kërkohet lëshimi i urdhrit për kryerjen e procedurës së lirimit, për shkak se ai në date 04.07.2024, përfundon ekzekutimin e vendimit të dënimit me 25 vjet burgim.
Po ashtu kërkohet pajisja e Dritan Dajti me një vërtetim në të cilin saktësohen kohëzgjatja e vuajtjes së dënimit, uljet dhe përfitimet për shkak të ligjit, si dhe kohëzgjatja e lloji i punës së kryer në institucion.
Në kërkesën drejtuar burgut theksohet po ashtu dhe lëshimi i vërtetimit me të dhëna për aftësimin profesional të fituar gjatë kohës së vuajtjes së dënimit, si dhe për qëndrimin dhe sjelljen e tij brenda institucionit.
Ndërkohë që seanca e rradhës u njoftua se do të zhvillohet në 30 korrik 2024 në ora 09.00.
gijotina.com/
Discussion about this post