Drejtori i Ujësjellësit në Kurbin, Alfred Prodani, do të dalë ditën e sotme para Gjykatës së Lezhës pasi ishte i shpallur në kërkim ndërkombëtar për vjedhje banesash në Spanjë.
Aktualisht, Prodani po mbahet në dhomat e paraburgimit të Komisariatit të Policisë Kurbin, në pritje për të dalë para gjykatës për kryerjen e procedurave përkatëse që do të çojnë në ekstradimin e tij.
Prodani u arrestua mbrëmjen e së premtes nga forcat policore të Komisariatit të Policisë Kurbin, në bashkëpunim me Interpol Tirana. 41-vjeçari banues në Kurbin u prangos pa bërë rezistence në qytetin e Laçit, ndërsa ndalimi i tij u bë me qëllim ekstradimi drejt Spanjës.
Ai ishte shpallur në kërkim, pasi Gjykata Coruna në Spanjë, në vitin 2013, ka lëshuar urdhër arresti ndërkombëtar, për veprën penale “Vjedhja me dhunë”, parashikuar nga Kodi Penal i Spanjës” informon Policia e Lezhës.
Ish kryeministrit Sali Berisha denoncoi në vitin 2019 se Prodani, kishte marrë pjesë në grabitjen e shtëpisë së yllit të Real Madrit, Karim Benzema, por në atë kohë 41-vjeçari mohoi akuzat.
Discussion about this post