Arrestohet Nikolin Janina në Shqipëri me qëllim ekstradimin në Spanjë, kapobanda i një grupi kriminal që trafikonte heroinë, morfinë e opium në disa vende të Bashkimit Europian.
Në përbërje të grupit kriminal që dyshohet se drejtohej nga biznesmeni i pllakave dhe hidrosanitareve, policia dhe prokuroria Spanjolle, kanë sekuestruar një sasi prej 53 kg e 380 gramë heroinë. Autoritetet e drejtësisë Spanjolle në vitin 2015 kanë marrë një vendim për caktimin e masës së “arrest në burg” ndaj shefit, duke e akuzuar si “Pjesëmarjes në grupe kriminale të trafikimit të narkotikëve”.
Drejtësia Spanjolle ka proceduar në 15 prill 2016 me nxjerrjen e emrit të biznesmenit Nikolin Janina, në listën e personave të shpallur në kërkim ndërkombëtar. Që prej kësaj date e deri më sot, policia dhe prokuroria shqiptare nuk kanë marrë asnjë lloj mase për arrestimin e biznesmenit Janina.
Në datën 12 korrik 2017, Gjykata e Krimeve të Rënda ka vendosur të sekuestrojë 13 pasuritë e Nikolin Janina, duke urdhëruar që ato tashmë të administrohen dhe përdoren nga Agjensia e Administrit të Pasurive të Paluajtshme pranë Ministrisë së Financave.
Dy muaj pas këtij vendimi, oficerët e policisë kryen ekzekutimin e këtij vendimi në hipotekë në terren. Nuk është e qartë se cilat kanë qenë arsyet se pse vendimi i gjykatës ka rënë në qetësi për dy muaj në zyrat e policisë së Tiranës, por me sa duket shtrirja e pasurive, mund të ketë dashur një kohë të gjatë për gjetjen e tyre në terren. Biznesmeni ka patur pasuri të ndryshme në Tiranë, Himarë. Dhërmi, Porto-Palermo, Vlorë dhe Kavajë ku spikasin apartamente dhe toka me sipërfaqe të ndryshme.
Discussion about this post