Prokurorja Vasjana Postoli është larguar nga hetimi i çështjes së vrasjes së 42-vjeçarit Egli Proga, ngjarje kjo e ndodhur më 10 Gusht të këtij viti në Pogradec, teksa si autor i dyshuar është arrestuar 29-vjeçari Denis Meçe.
Ky vendim për largimin e Postolit është marrë pas kërkesës së vetë familjarëve të Egli Progës, teksa çështja tashmë po hetohet nga vetë drejtuesja e Prokurorisë së Korçës, prokurorja Dhorina Theodhori.
Vlen të theksohet fakti se prokurorja Vasjana Postoli ishte ajo që i lehtësoi akuzën Denis Meçes. Fillimisht, Policia pas arrestimit, autoritetet policore e referuan dosjen ndaj Denis Meçes në Prokurori nën dyshimet për kryerjen e veprës penale “Vrasje me dashje”, akuzë e cila sipas Kodit Penal të Shqipërisë dënohet nga 10 deri në 20 vjet burgim.
Por, pas 40 orësh Prokuroria e Korçës i zbuti akuzën 29-vjeçarit, pasi depozitoi dosjen në Gjykatë për rivlerësimin e masave të sigurisë për veprën penale “Vrasje nga pakujdesia”. Kjo vepër penale dënohet me gjobë ose maksimumi me burgim deri në 5 vjet.
Kjo ngjarje e rëndë bëri bujë mediatike, për shkak se familjarët akuzuan institucionet për mosveprim në kohë dhe tentativë për të fshehur ngjarjen, pasi Denis Meçe njihet si një person problematik në zonë, kjo edhe për shkak se kishte mbështetjen e dajës së tij, Valter Gora, një ish-drejtor me “pushtet rilindas” në Pogradec, i cili ka mbajtur poste të rëndësishme në juglindje, i përfshirë në shumë afera, si dhe i arrestuar për korrupsion.
Më pas, pati dhe një “ping pong” mes Prokurorisë së Korçës dhe Policisë së Shtetit lidhur me përgjegjësinë e çështjes.
Discussion about this post