Një biznesmen i njohur grek, i identifikuar si Christos Gialia, 59 vjeç, u ekzekutua mbrëmjen e së mërkurës në Athinë.
Ngjarja ndodhi në zonën industriale të Athinës e quajtur Mandra, 20 km në veri-perëndim të kryeqytetit të vendit.
Policia thotë se ndaj viktimës u qëllua me breshëri kallashnikovi. Viktima ka humbur jetën në vendin e ngjarjes, ndërsa policia gjeti një automjet duke u djegur shumë pranë vendit të krimit, që dyshohet se u përket autorëve.
Gialia ishte një biznesmen i njohur veçanërisht në tregtinë e mishit, sikundër zotëronte edhe një fabrikë bojrash dhe ka qenë president i ekipit të futbollit të Trikallas.
Ai ishte martuar me një grua shqiptare nga Elbasani dhe kishte me të një fëmijë. Bashkëshortja e parë e tij ishte ekzekutuar në mënyrë misterioze në vitin 2018 dhe autorët nuk janë gjendur kurrë.
Emri i tij është përfshirë edhe në Shqipëri në disa aktivitete tregtare, import-eksport mallrash tregtie nga vendet e Amerikës Latine drejt Shqipërisë me stacion ndërmjetës Athinën, tregti mishi, boje dhe blerje pronash.
Ai kishte të punësuar më shumë se 4000 punonjës në dhjetëra kompanitë dhe bizneset e tij.
Policia thotë se dy janë pistat e hetimit: ajo e larjes së hesapeve mes bandave të kontrabandës së cigareve që operojnë në zonën e Elefsine, si dhe pista e prishjes së bizneseve me partnerët e tij shqiptare në bizneset që ai kryente me vendin tonë.
Viktima ka qenë ortak jo zyrtar me Thimio Dobroniku, një shtetas shqiptar i ekzekutuar pak muaj më parë në Faliro të Athinës.
Dyshimet janë se ekzekutorët janë gjeorgjianë.
Discussion about this post