Në ditën e 103-të të protestës, mesazhi nga sheshi këtë herë ishte i drejtuar veçanërisht ndaj të rinjve.
Një prej protestuesve u bëri apel që të mos lejojnë përplasjet mes tyre të zbehin qëllimin e kauzës dhe unitetin e krijuar gjatë javëve të protestës.
Duke iu drejtuar brezit të ri, ai kërkoi që debatet dhe konfliktet e momentit të mos kthehen në një pengesë për lëvizjen.
“Mos u përçani dhe mos lejoni që përplasjet t’ju marrin atë që keni ndërtuar në 103 ditë rezistencë. Një debat i çastit nuk duhet të rrëzojë besimin që një komb ka te rinia e tij”, u shpreh ai.
Protestuesi e cilësoi ruajtjen e bashkimit si një nga sfidat më të rëndësishme të këtij momenti, duke u kërkuar të rinjve të qëndrojnë krah njëri-tjetrit.
“Ju nuk jeni armiq, por bij të së njëjtës Shqipëri. Ne, të moshuarit që ju kemi mbështetur, duam t’ju shohim krah për krah dhe jo duke u përplasur. Historia nuk do të kujtojë kush bërtiti më fort kundër tjetrit, por kush pati forcën të qëndrojë bashkë në një moment vendimtar”, tha ai.
Në vijim të fjalës së tij, ai iu referua edhe rolit të të rinjve në të ardhmen e vendit, duke i nxitur të mos humbin fokusin dhe të ruajnë shpresën.
“Rinia duhet të ndizet nga shpresa. Mos e humbni kauzën. Bashkohuni dhe vazhdoni përpara, sepse Shqipëria ka nevojë për një rini që bashkon dhe jo për një rini që përçahet. Bëhuni krenarë”, u shpreh protestuesi.
Në fund, mesazhi i tij ishte edhe për shqiptarët që jetojnë jashtë vendit. Ai i ftoi pjesëtarët e diasporës të rikthehen në Shqipëri, duke e përshkruar vendin si një nënë që po përballet me një situatë të rëndë.
“Diasporë, kthehu te nëna. Mbi trupin e saj është bërë gjëma”, ishte apeli i tij.
Discussion about this post