Të paktën 13 amerikanë kanë gjetur vdekjen nga vala e të nxehtit ekstrem që ka torturuar jugun e Shteteve të Bashkuara të Amerikës në dy javët e fundit, thanë zyrtarët të premten.
Numri më i madh i vdekjeve, 11 persona, u regjistrua në shtetin amerikan të Teksasit, pranë kufirit me Meksikën.
“Që nga e mërkura, ka pasur 11 vdekje gjithsej”, thanë zyrtarët lokalë në një deklaratë për agjencinë mediatike AFP.
Një 14-vjeçar vdiq javën e kaluar kur po ecte në një park në Teksas, ku temperaturat arritën 48 gradë celsius.
Në mënyrë tragjike, njerku i viktimës ka ndërruar jetë në një aksident automobilistik, teksa po nxitonte për ta shpëtuar djalin.
Ndërkohë një grua 62-vjeçare humbi jetën në Luiziana, javën e kaluar, pasi një stuhi la mijëra familje pa energji dhe rrjedhimisht pa ajër të kondicionuar, sipas zyrtarëve lokalë.
Ditët e fundit, temperaturat në disa qytete jugore të SHBA-së kanë qenë shumë të larta dhe autoritetet lokale në Teksas kanë ngritur disa qendra ftohjeje.
Discussion about this post