Lideri i Partisë Demokratike të Kosovës, Memli Krasniqi, ka thënë se prej një jave i ka dërguar një letër kryeministrit Albin Kurti me shqetësimet e opozitës rreth gjendjes së pandemisë në vend, por ende nuk ka marrë një përgjigje.
Në një postim në Facebook, Krasniqi thotë se kryeministri i Kosovës, Albin Kurti dhe qeveria e tij po ikin nga përgjegjësitë që kanë karshi nevojave të qytetarëve në këtë periudhë tragjike “të shkaktuar nga keqmenaxhimi i pandemisë”.
‘ Kryeministri Kurti nuk u bë i gjallë. As në letra, as në terren. As në Qeveri, as pranë qytetarëve, as pranë pacientëve. Ne e dimë që nuk jemi atraktivë për të, sepse postulatet ideologjike e seminarike nuk mund t’i shesë në PDK. Megjithatë, kemi besuar se ka aq integritet e përgjegjësi politike sa për ta bërë prioritet themelor trajtimin e gjendjes me pandeminë”, shkroi Krasniqi në Facebook.
