Pas firmosjes së marrëveshjes mes dy partive për zgjedhjet lokale, kreu i opozitës Sali Berisha dhe kreu i Partisë së Lirisë Ilir Meta, kanë folur mbi qëllimet e saj, ndërsa theksuan se është e jashtëzakonshme. Meta dhe Berisha e konsideruan historike marrëveshjen mes dy partive.
Gjithashtu kryetari i Partisë së Lirisë Ilir Meta tha se nuk është i penduar që ka prishur marrëveshjen me PD-në në 2013. Ai tha se e ka mbyllur tashmë këtë çështje pas 4 vitesh me bashkëqeverisje, duke iu referuar marrëveshjes së nënshkruar ditën e sotme mes dy partive.
“Lidhur me marrëveshjen e 2013, ish LSI përfshirë dhe Ilir Metën nuk kanë prishur asnjë marrëveshje. Kur erdhi fundi i marrëveshjes, para se të niste fushata, u deklarua një marrëveshje që e kishte mbyllur rolin e saj. Nuk ka ndonjë pendesë në këtë drejtim. Sa i takon të gjitha vendimeve të ish-LSI, të gjitha kanë qenë në interes të integrimit evropian të vendit. Pasi qeverisja e Nanos u bë pengesë e integrimit, LSI dha një rol të rëndësishëm në 2005. Berisha firmosi MSA-në që ishte bllokuar dhe sot jemi këtu ku jemi për shkak të pengmarrjes që i ka bërë Rama shtetit. Edhe vendimet e tjera kanë qenë për vullnetin e mirë për të zhbllokuar të tilla situata. Edhe në 2013 marrëveshja me Ramën ka qenë për të votuar 3 ligjet që mbanin peng integrimin, pasi mendova që në këtë mënyrë kontribuonim për të zhbllokuar këtë proces”, tha Meta.
Ndërsa, kryetari i Partisë Demokratike Sali Berisha është shprehur se në politikë nuk ka interesa personale, teksa i kujtuan kohët kur Meta ishte krahë Ramës në qeverisjen e tij. Ai ndër të tjera theksoi se interesi i përgjithshëm i marrëveshjes mes dy partive që u firmos sot është i jashtëzakonshëm.
“E vërteta është që edhe një herë sa herë ta komentosh këtë marrëveshje do gjesh se është marrëveshje e groposjes politikisht të një njeriu që shok për negativitete ka vetëm veten që kur është qeverisur Tirana për herë të parë nga Edi Rama e deri sot. Duhet ta shihni me shpresë e besim si marrëveshjen e ndryshimeve që presin shqiptarët. Në politikë nuk ka interesa personale, por politike të përgjithshme. Ata që udhëhiqen nga interesa personale gabojnë. Interesi I përgjithshëm i kësaj marrëveshje është i jashtëzakonshëm”, tha Berisha.
Discussion about this post