Konkurset për zgjedhjet e krerëve të rinj të institucioneve në vend ndodh rëndom që të jenë një fasadë e një vendimmarrje të caktuar kohë më parë. Të njëjtat hije dyshime janë ngritur edhe për konkursin e zgjedhjes së kreut të ri të Policisë së Shtetit.
Në media janë përfolur disa emra si të destinuar me “urdhër nga lart” të marrë postin pas dorëheqjes që erdhi me ndryshimin e pronarit të karriges së Ministrit të Brendshëm.
Megjithatë, kandidati më i mundshëm, siç mëson “Gijotina” nga burime konfidenciale, është Gentjan Shehaj. Emri i tij është në listën emërore të 15 të interesuarve për të marrë detyrën e Drejtorit të Përgjithshëm të Policisë së Shtetit, zyrtarizuar të Enjten e 19 Shtatorit nga Ministria e Brendshme.
Kandidatët, referuar një urdhri nga Ministri i Brendshëm, do të vlerësohen sipas një sistemi pikëzimi nga një komision tre anëtaresh i drejtuar nga një zëvendësministër i Brendshëm i emëruar nga vetë ministri. Sekretari i Përgjithshëm i Ministrisë së Brendshme (Suzana Hoxha) dhe drejtori i Përgjithshëm i Agjencisë së Mbikëqyrjes Policore (Florian Sulejmani) janë dy anëtarët. Pra, i gjithë komisioni është i emëruar nga politika dhe mbetet nën ndikim politik. Procedura parashikon më tej që pikërisht më i vlerësuari nga ky komision do të propozohet për tu emëruar në krye të Policisë nga Ministri i Brendshëm Ervin Hoxha, te kryeministri Edi Rama. Është pikërisht Rama që ka në dorë firmën për të zgjedhurin e ri. Dhe sipas të njëjtave burime, kanakari i kreut të qeverisë për këtë post, të paktën momentalisht, është Gentjan Shehaj.
Gentjan Shehaj ka mbajtur poste si këshilltar i Drejtorit të Përgjithshëm të Policisë, shefi i sektorit të luftës kundër pastrimit të parave në SHCCBA (ish-AMP) si edhe detyrën e kreut të Drejtorisë së Policisë Vendore të Vlorës (2017-2019). Dhe me gjasë, së shpejti mund të marrë postin më të rëndësishëm të karrierës së tij, atë të kreut të Përgjithshëm të Policisë së Shtetit. Së fundmi, kryeministri Rama ka zgjedhur në detyra të rëndësishme, madje edhe ministrore, emra me profil të ulët politik e publik dhe përzgjedhja e Gentjan Shehajt përkon me përqasjen e tij të re.
Një tjetër emër i përfolur në media si një ndër kandidatët më të mundshëm për tu katapultuar në karrigen e Drejtorit të Policisë është ai i Ardian Çipës, i cili është denoncuar si person me lidhje të ngushta me ish-deputetin dhe biznesmenin Aqif Rakipi. Ky i fundit i shpallur “non grata” nga Shtetet e Bashkuara, që e ka cilësuar si “një ish-deputet famëkeq nga Elbasani, i cili ka ndikim të dëmshëm dhe destabilizues në proceset politike në Shqipëri” dhe “i lidhur ngushtë me një grup kriminal të organizuar”. Ardian Çipa ka mbajtur poste të rëndësishme në Polici si kreu i Drejtorisë së Elbasanit dhe Gjirokastrës.
Në skenë ka dalë dhe emri i Ilir Prodës. Megjithatë zhurma e krijuar nga aksioni i SPAK që vendosi sekuestrimin e telefonit të Drejtorit të Policisë së Elbasanit pas dyshimeve për konspiracion në aksionin që goditi grupin Çopja, do të përbente një zgjedhje të keqe marketingu: Një drejtor Policie i dyshuar për lidhje me krimin e organizuar. Emri i një drejtuesi pa akuza publike do të ishte më i preferuar për fasadën që po tenton të krijojë Edi Rama.
Discussion about this post