Lajmi i ndarjes nga jeta për shkak të Covid-19 të fizioterapistit të Kombëtares, Ylli Mihalit i ka prekur të gjithë këtë të premte. Reagimet kanë qenë të shumta si nga bota e sportit ashtu edhe nga personat e tjerë që e njihnin atë.
Së fundmi ka qenë ish-trajneri që qëndroi në krye të Kombëtares shqiptare për 6vite, Gianni de Biasi ai i cili përmes një reagimi në rrjetet e tija sociale është prekur shumë nga kjo ngjarje dhe shprehet se tashmë në Shqipëri do ketë një mik më pak.
“Jam vërtet i trishtuar për humbjen e mikut tim Ylli. Personi që e vlerësova shumë, njerëzisht dhe profesionalisht. Fiziku i tij i bëshëm fshehu një shpirt të mirë dhe bujar, një person autentik që e donte punën e tij dhe Kombëtaren tonë. Fatkeqësisht do të kem një mik më pak në Shqipëri, por unë do të mbaj praninë tënde të dashur Ylli në zemrën time. Faleminderit për gjithçka. PREHU NE PAQE MIKU IM!”- shkruan tekniku italiano-shqiptar.
Ndërkohë theksojmë se pavarësisht faktit që Mihali i kishte bërë të dyja dozat e vaksinës Phizer, nuk ia ka dalë që të fitojë betejën me virusin e rrezikshëm./Gijotina.com
