Afrika e Jugut po shqyrton opsionet ligjore se si Vladimir Putin, subjekt i një urdhër-arresti ndërkombëtar për krime lufte, do të mund të merrte pjesë në një samit të ekonomive në zhvillim të BRICS në Johannesburg, tha sot ministrja e Jashtme Naledi Pandor.
Gjykata Ndërkombëtare Penale ka lëshuar një urdhër-arrest për presidentin rus në lidhje me pushtimin rus të Ukrainës dhe Afrikës së Jugut si një anëtare e Gjykatës së Hagës, teorikisht do t’i kërkohet ta arrestojë atë nëse merr pjesë në samitin e BRICS.
“Qeveria jonë aktualisht po shikon se cilat janë opsionet ligjore në lidhje me këtë çështje dhe besoj se presidenti do të jetë personi më adekuat për të folur për [këtë] pasi të ketë arritur një përfundim”, deklaroi Pandor në margjinat e një takimi të ministrave të jashtëm të BRICS në Cape Town.
Ftesat u janë dërguar të gjithë krerëve të shteteve nga Brazili, Rusia, India, Kina dhe Afrika e Jugut për samitin e 22-24 gushtit në Johannesburg.
Gjykata me seli në Hagë të Holandës lëshoi urdhrin për arrestimin e liderit rus në muajin mars dhe e akuzoi atë për krim lufte për dëbimin me forcë të fëmijëve nga territori i pushtuar i Ukrainës.
Ndryshe, në një deklaratë të botuar në gazetën zyrtare të Afrikës së Jugut, Ministri për Marrëdhëniet Ndërkombëtare, Naledi Pandor njoftoi se kishte miratuar imunitetin diplomatik për të gjithë pjesëmarrësit në ngjarje./Telegrafi
Discussion about this post