Deputetja e PD, Albana Vokshi ka marrë pjesë në prezantimin e gjetjeve të studimit të kryer nga “Together for Life” për monitorimin e buxhetit të pandemisë.
Sipas Vokshit, nga 164 mijë qytetarë të prekur nga Covid, janë rimbursuar vetëm për 4 % e të sëmurëve, ndërsa sipas saj, studimet nxjerrin në pah denoncimet e PD se buxheti i shëndetësisë është përdorur për të pasuruar klientët e kryeministrit Rama.
“164 mijë qytetarë të prekur nga COVID (gjatë periudhës 2020-prill 2021), të rimbursuar vetëm 7,183 pra vetëm për 4 % e të sëmurëve. 1 mijë dollarë shpenzoi mesatarisht cdo i sëmurë për t’u kuruar, ndërsa qeveria rimbursoi vetëm 40 dollarë për të sëmurë, vetëm 4% e shpenzimeve individuale. Gjetjet e studimit të kryer nga “Together for Life” nxjerrin në pah shqetësimin e drejtë të ngritur nga PD se buxheti i shëndetësisë nuk u përdor për të ndihmuar shqiptarët, por për të pasuruar akoma më shumë klientët e Edi Ramës”.
Ndër të tjera, Vokshi shkruan se “tenderat sekretë blenë mjete mbrojtëse me 3-4 fishin e çmimeve të tregut me pakicë, por shërbimi për pacientët nuk u përmirësua, mjekët dhe stafi në qendrat shëndetësore patën trajtim qesharak, duke marrë vetëm 2 kuti me maska mbrojtëse në 18 muaj e për mjete të tjera mbrojtëse”.
Deputetja shprehet se në mbledhjen e Komisionit Parlamentar të Shëndetësisë do të kërkojnë transparencë të plotë për fondet e pandemisë.
