Policia në Peru ka bërë një zbulim të habitshëm kur ushtruan kontroll ndaj një korrieri pasi ky i fundit ishte sjellë si i dehur në një sajt arkeologjik antik në Puno. Brenda çantës së termusit të tij ndodhej një mumie antike. Personi që e kishte tha se ndante dhomën me të dhe e konsideronte si të dashur.
Ai e kishte futur mumien në çantë që t’ua tregonte shokëve. I arrestuari tha se e quante atë “Juanita” dhe e mbante në një kuti pranë televizorit. Korrieri shtoi se mumien e zotëronte babai i tij, por pa specifikuar se si i ati e kishte marrë në zotërim.
Ekspertët thonë se kufoma është 600 deri në 800-vjeçare dhe se i përket një mashkulli të rritur e jo femre siç pretendonte korrieri.
BBC shkruan se sipas llogaritjeve, mashkulli i mumifikuar është më shumë se 45 vjeç dhe 1.51 metra i gjatë. Mumia është mbështjellë me fasho në pozicionin e fetusit, diçka normale për varrimet pre-hispanike në zonë.
Mumifikimi ishte një praktikë e disa kulturave të ndryshme në Peru para arritjes së pushtuesve spanjollë. Disa mumie u varrosnin ndërsa të tjera nxirreshin për festivalet kyçe.
Policia ka sekuestruar mumien dhe ia ka dërguar atë Ministrisë së Kulturës. Korrieri që e transportonte dhe dy miqtë e tij, janë të moshave nga 23 deri në 26 vjeç.
Ata u vunë në pranga dhe po hetohen për krime ndaj trashëgimisë kulturore të Perusë.
Discussion about this post