Pas vendimit të parlamentit për nisjen e punës me Reformën Territoriale, PD ka reaguar duke e konsideruar si një hap shumë të rëndësishëm.
Deputetja Dhurata Çupi në një deklaratë të bërë nga selia blu, e ka konsideruar reformën territoriale një nga prioritetet e PD, ndërsa u shpreh se është ngritur grupi i punës për të nisur konsultime me qytetarët dhe ekspertët në çdo cep të vendit.
Çupi akuzoi Ramën se Reforma e vitit 2014, solli më pak shërbime dhe se u përdor nga kryeministrit për krijimin e zonave elektorale që do t’i shërbenin atij.
“Më pak shërbime, më shumë të punësuar dhe shumë para të çuara dëm. Kjo është ajo që prodhoi reforma administrative e Edi Ramës në 2014-ën. Qëllimi i vërtetë i Edi Ramës nuk ishte vetëqeverisja vendore, por, krijimi i zonave elektorale, ashtu siç i interesonte atij. Pasi për të, çdo vendim është përfitim monetar dhe kalkulim votash, dhe normalisht qytetarët janë të fundit. Shpenzimet për administratën e bashkive pas ndarjes administrative janë rritur mbi 23 %, dhe shërbimet publike në ish-komuna janë përkeqësuar. Në pjesën më të madhe ka zero investime në këto vite, rrugë të shkatërruara, mungesë uji, mungesë investimesh në sektorin energjetik etj. Mungesa e investimeve bën që qytetarët e zonave të thella të udhëtojnë deri në 4 orë për të shkuar në zyrat e bashkisë”, tha Çupi.
Ndër të tjera, deputetja i ka bërë thirrje qytetarëve dhe ekspertëve që të mund t’i bashkohen reformës duke dhënë mendimin e tyre.
Discussion about this post