I shpallur në kërkim, Albi Biçaku njihej si djali “problematik i doktorit”/ Detajet

Policia e Shtetit njoftoi sot finalizimin e operacionit të koduar “Rrjeti” ku u arrestuan 45 persona, ndërsa 7 u shpallën në kërkim.

Një prej personave të shpallur në kërkim është edhe Albi Biçaku, një emër i njohur për policinë.

Më 21 shkurt, 27-vjeçari Biçaku qëlloi me armë zjarri në drejtim të një lokali në Librazhd ku ndodheshin disa të rinj.

Ai plagosi në këmbë 35-vjeçarin Shpëtim Skura, i cili ndodhej rastësisht në tavolinë bashkë me disa miq. Biçaku synonte të qëllonte 37-vjeçarin Rinor Hajdari, me të cilin kishte pasur konflikt më herët.

Në qytetin e Librazhdit, 27-vjeçari njihej si djali problematik i doktorit, pasi babai i tij është mjek prej kohësh në disa fshatra të Librazhd.

Në zgjedhjet e fundit babai i Albit, u zgjodh këshilltar në Bashkinë e Librazhdit nën siglën e partisë Social Demokrate të drejtuar nga Tom Doshi.

Në kuadër të operacionit të sotëm të koduar “Rrjeti”, policia goditi 4 grupe kriminale që ushtronin veprimtaritë kriminale të prodhimit, shpërndarjes dhe trafikimit të lëndëve narkotike, si dhe të armëmbajtjes pa leje.

Referuar të dhënave, 11 prej të dënuarve kanë qenë të dënuar dhe më parë për krime të kryera në fushën e narko-trafiqeve, ndërsa 10 të tjerë kanë qenë të dënuar për vepra të ndryshme penale.