Një 40-vjeçar nga Dibra ka rënë në prangat e policisë, pasi prej 10 vitesh kërkohej nga Interpoli dhe sistemi Tims. Blerim Troca fshihej prej 10 vitesh në Shijak, ndërsa ishte dënuar në Itali me 8 vite burg pasi ishte shpallur fajtor për veprën penale “Marrëdhënie seksuale me dhunë me të mitura”.
“Shërbimet e Komisariatit të Policisë Shijak, në bashkëpunim me strukturat e DVP Durrës, bënë të mundur lokalizimin, kapjen dhe arrestimin me qëllim ekstradimin drejt Italisë, të Blerim (Bekim) Trocës, 40 vjeç, banues në Shijak, Durrës. Arrestimi i tij u bë pasi Gjykata e Santa Maria Capua, Itali, e ka dënuar me 8 vjet burgim për veprën penale “Marrëdhënie seksuale me dhunë me të mitura’”, thuhet në njoftimin e policisë.
Interpol Tirana, në bashkëpunim me Interpol Romën, po vijojnë me procedurat për ekstradimin e tij drejtë Italisë. Nuk është herë e parë që kriminelë të shumëkërkuar në vendet e huaja përdorin Shqipërinë si vendstrehimi, për shkak të strukturave të brishta të policisë dhe rendit në vendin tonë.
