Kandidati i koalicionit opozitar Partia Demokratike – Aleanca për Shqipërinë Madhështore, Ndrec Pjetri, ka bërë publike thirrjen që i është bërë nga Prokuroria e Posaçme SPAK, ku ai dhe disa nga bashkëpunëtorët e tij janë pyetur lidhur me fushatën zgjedhore të 11 majit 2025.
Përmes një reagimi në rrjetet sociale, Pjetri tha se ndihet i surprizuar dhe i zhgënjyer, ndërsa shpreh pakënaqësinë që, sipas tij, hetimet përqendrohen tek opozita, ndërsa kundërshtarët politikë që kanë shkelur ligjin, nuk përballen me drejtësinë.
“Në 24 orët e fundit unë dhe bashkëpunëtorët e mi jemi thirrur në Prokurorinë e Posaçme SPAK për t’u pyetur në lidhje me fushatën zgjedhore të 11 majit 2025. Unë isha kandidat në qarkun e Durrësit dhe në garën time të parë mora 4500 vota,” – shkruan Pjetri.
Ai thekson se gjatë fushatës ka zhvilluar takime derë më derë me qytetarët, ndërsa i konsideron akuzat apo dyshimet ndaj tij të pabaza dhe të padrejta.
“Unë zotohem përpara jush që 4500 votat e mia janë vota djerse dhe të ndershme, dhe as unë, as familja ime, nuk kemi pasur dhe nuk kemi lidhje me asnjë paligjshmëri para, gjatë apo pas 11 majit.”
Pjetri i bën thirrje drejtësisë të veprojë paanshmërisht dhe pa selektivitet politik, ndërsa nënvizon se është i gatshëm të bashkëpunojë për të vërtetën, duke ruajtur integritetin dhe dinjitetin politik.
Discussion about this post