I vdiq nëna, Gjykata Speciale jep detaje për vizitën e Kadri Veselit në Kosovë

Gjykata Speciale ka dhënë një përgjigje lidhur me vizitën e ish-kreut të UÇK-së, Kadri Veseli, në Kosovë.

Veseli është kthyer në vendlindje pasi disa ditë më parë i vdiq nëna në moshën 93 vjeçare.

“Për shkak të arsyeve detyruese humanitare, gjyqtari i procedurës paraprake udhëzoi Sekretarin që të menaxhojë një vizitë nën mbikëqyrje në Kosovë për z. Veseli për të takuar familjen. I akuzuari mbetet në paraburgim dhe në mbajtje nga Dhomat e Specializuara. EULEX-i dhe Policia e Kosovës po mbështesin Dhomat e Specializuara të Kosovës”, kanë thënë nga Dhomat e Specializuara për Gazetën Express.

Nga Specialja nuk është dhënë detaje se për sa kohë do të qëndrojë Veseli në Kosovë.

“Për arsye operacionale dhe për të respektuar privatësinë e z. Veseli, nuk mund të japim asnjë informacion shtesë për vizitën e kujdestarisë në Kosovë”, ka thënë zëdhënësi Michael Doyle.

Veseli ka ardhur në vendlindjen e tij ku sot ka shkuar për të vizituar varrin e nënës, varrimi i së cilës u bë dje.

Para disa muajve Veseli ishte lejuar të vinte në Kosovë nga Haga edhe një herë pasi kishte ndërruar jetë babai i tij.

Ndryshe, Veseli është në paraburgim së bashku me disa ish-krerë të tjerë të UÇK-së në Hagë.