I vodhën 220 mijë euro taksistit në Tiranë, shpallen në kërkim 4 gjeorgjianë

Policia e Tiranës ka zbardhur vjedhjen e rreth 220 mijë eurove që po transportoheshin nga një taksist pak ditë më parë në kryeqytet.

Në kërkim janë shpallur katër shtetas gjeorgjianë, të cilët sipas burimeve kanë hyrë në Shqipëri nga Maqedonia e Veriut përmes një makine të marrë me qira.

Më pas për të realizuar vjedhjen ata kanë përdorur një motor, të blerë tek po një shtetas i huaj.

Gjeorgjianët e shpallur në kërkim janë: Levan Kiria, Tengiz Natchkebia, Noshrevani Kutalia dhe Yousuf Bozkurt.

Njoftimi

Finalizohet operacioni policor i koduar “Taxi”, nga Komisariati i Policisë Nr. 2 në bashkëpunim me Sektorin për Hetimin e Krimeve të Rënda.

Zbardhet dhe dokumentohet me prova ligjore vjedhja e një shume parash në një taksi në rrugën “Ibrahim Rugova”, më datë 04.10.2024.

Punohet për kapjen e 4 shtetasve gjeorgjianë, autorë të dyshuar.

Shërbimet e Komisariatit të Policisë Nr. 2 në bashkëpunim me Sektorin për Hetimin e Krimeve të Rënda, në vijim të punës për zbardhjen e ngjarjes së ndodhur më datë 04.10.2024, ku në zonën e ish-Bllokut, disa shtetas kanë vjedhur një shumë parash në një taksi, kanë organizuar punën për zbardhjen dhe dokumentimin e plotë ligjor të ngjarjes e identifikimin e autorëve të dyshuar dhe kanë finalizuar operacionin policor të koduar “Taxi”.

Nga veprimet hetimore të kryera në kuadër të këtij operacioni, ka rezultuar se autorë të dyshuar të kësaj vjedhje janë shtetasit L. K., 30 vjeç, T. N., 36 vjeç, N. K., 30 vjeç, dhe Y. B., 31 vjeç, me shtetësi gjeorgjiane, për të cilët po punohet për kapjen dhe arrestimin e tyre.

Në cilësinë e provës materiale u sekuestrua një motomjet, si dhe është shpallur në kërkim një automjet që dyshohet se është përdorur gjatë kryerjes së kësaj ngjarje.

Materialet i kaluan Prokurorisë.