Dy persona kanë rënë në pranga ditën e sotme, pasi disa më parë kishin vjedhur me dhunë një varëse nga shtetasja me inicialë I.K. në zonën e Astirit. Së bashku me ta e ka pësuar edhe pronari i një argjendarie që në këmbim të parave bleu varësen e vjedhur prej grabitësve. Menjëherë policia ka bërë identifikimin e tyre nga kamerat e sigurisë të zonës përreth dhe filloi kërkimin e tyre. Pas dy ditës të rinjtë u arrestuan në Lezhë, ku po fshiheshin për të shpëtuar nga uniformat blu.
Sipas të dhënave të publikuara, në pranga kanë rënë O. H., 18 vjeç, dhe K. H., 24 vjeç, banues në Lezhë, për veprën penale “Vjedhja me dhunë”, kryer në bashkëpunim. Më datë 08.07.2022, në Komisariatin e Policisë Nr. 6, ka bërë kallëzim shtetasja I. K., se në zonën e Astirit, persona të paidentifikuar i kanë vjedhur varësen me dhunë.
Strukturat e Policisë kanë organizuar menjëherë punën për zbardhjen dhe dokumentimin me prova ligjore të kësaj ngjarjeje. Pas një pune të mirëfilltë hetimore disaditore janë identifikuar dhe vënë në pranga shtetasit O. H dhe K. H., të cilët në bashkëpunim me njëri-tjetrin, i kanë vjedhur me dhunë varësen shtetases I. K., dhe më pas e kanë shitur atë në një argjendari në qytetin e Lezhës. Në vijim të veprimeve hetimore u procedua penalisht në gjendje të lirë, pronari i argjendarisë, shtetasi I. G., 39 vjeç, banues në Lezhë, për veprën penale “Përvetësimi i parave ose mallrave që rrjedhin nga vepra penale ose veprimtaria kriminale”.
Discussion about this post