Një incident është regjistruar mbrëmjen e sotme në komisariatin e Elbasanit.
Mësohet se një person i ka vënë flakën murit të jashtëm të komisariatit, përkatësisht dritares së zyrës së informacionit për qytetarët.
Siç sqaron policia, rreth orës 18.30, shtetasi Aurel Latifi, 33 vjeç, banues në Elbasan, ka hedhur një shishe me lëndë djegëse te zyra e informacionit në Komisariatin e Policisë Elbasan, të cilën e ka ndezur dhe është larguar me vrap.
Efektivët e Policisë menjëherë kanë fikur zjarrin dhe kanë kapur autorin e dyshuar i cili, nga veprimet paraprake dyshohet se vuan nga probleme të shëndetit mendor.
“Nën drejtimin e Prokurorisë grupi hetimor po punon për sqarimin e rrethanave të ngjarjes dhe kryerjen e veprimeve procedurale për veprën penale “Shkatërrim i pronës me zjarr””, njofton policia.
Burime bëjnë me dije se, i riu pasi është ndaluar nga policia dhe është marrë në pyetje, është shoqëruar për ndihmë mjekësore pasi ka marrë disa plagë.
Discussion about this post