Sot në rubrikën “Ka një mesazh për ty” është treguar historia e një gruaje nga Lezha, Frangës. Franga rrëfen se babai i saj e kishte martuar ende pa u ngjizur.
Pasi Franga u rrit vendosi të vazhdonte shkollën, të kryente gjimnazin dhe të përfundonte shkollën e lartë, megjithëse i ati e kundërshtonte, pasi donte ta martonte me djalin të cilit ia kishte premtuar.
Por Franga e refuzon djalin me të cilin babai e kishte martuar ende pa ardhur në jetë. Ajo tregoi që i ati ishte shumë i dhunshëm me familje. Franga u shpreh se nuk do ta falë kurrë për ato që ka bërë edhe pse ka vdekur.
Ajo rrëfen një nga momentet rrëqethëse, ku i ati kishte rrahur të vëllain.
“Mbaj mend një moment, kur vëllain tim e ka lidhur me një tel në dorë dhe një tel në këmbët edhe e rrihte me dajak sepse vëllai im kishte kullotur delet dhe ato kishin hyrë dhe kishin bërë dëm në parcelat e kooperativës”, tha Franga.
Më pas tregoi se babai kishte keqtrajtuar edhe nënën.
“Edhe me nënën time është sjellë jashtëzakonisht keq. Në vitin e parë të shkollës së mesme, im atë kur vjen e më merr tek shkolla për të shkuar tek shtëpia një të shtunë, fillon dhe më tregon se si kishte torturuar nënën time, kur ai i kishte vënë litarin në fyt. Unë nga ai moment, babain nuk kam dashur ta shoh me sytë e ballit, për mua ai nuk ishte më baba”, rrëfen Franga.
Ndërsa tha se, ka pasur skena edhe më tmerrshme por që nuk mundet t’i shpreh në ekran.
