I zhdukur prej 5 ditësh/ Nëna e 16-vjeçarit apel për ndihmë: Ju lutem, kush e gjen të më telefonojë!

16 vjeçari nga Korça Anxhelo Abidini, pesë ditë me parë, është larguar nga banesa pa njoftuar familjarët.

Ka qenë nëna e të miturit ajo që ka denoncuar rastin në polici.

Nëna e të miturit Ermelina Mustafa thotë se shkak i largimit të djalit nga shtëpia ka qenë njoftimi i prokurorisë së Korçës për përfundimin e hetimeve, për procedim penal të nisur ndaj tij, për vjedhjen e një celulari.

I mituri, sipas pohimit të nënës, është trembur dhe larguar nga shtëpia.

Në një prononcim për mediat, nëna e 16-vjeçarit u shpreh: “Të hënën është larguar, nuk e di arsyen, por i erdhi fleta e gjyqit dhe ai u tremb. Ne e kemi kërkuar. Ditën e mërkurë kam bërë denoncimin. Ne kemi dalë edhe vetë, e kemi kërkuar te të gjithë njerëzit, por ende asgjë. Nuk e di ku mund të jetë, por mund të jetë edhe jashtë vendit, jashtë Korçës. Nuk di çfarë të them. Njoftimi i gjykatës lidhet me një çështje për një telefon të vjedhur, që ishte ngatërruar këtu e tetë muaj më parë. Djali ishte nën masën detyrim paraqitje. Ju lutem bëj thirrje, kush e gjen të më telefonojë. Djali është në klasën e pestë”.

Lidhur me rastin, doli me një njoftim të shkurtës edhe policia e Korçës, që konfirmoi se “në Komisariatin e Policisë Korçë është paraqitur shtetasja E. M., 34 vjeçe, banuese në Korçë, e cila ka kallëzuar se më datë 09.12.2024, është larguar nga banesa, djali i saj 16 vjeç”. “Po punohet për gjetjen e tij”, shtuan më tej blutë.