I zuri skela/ Dëshmitarja: Vajza e mbuluar me gjak, burri pa ndjenja

Incidenti në zonën e ish-Parkut të Autobusëve në Tiranë tmerroi qytetarët që ndodheshin aty pranë, në një rrugë me qarkullim të rënduar.

Një vajzë që u bë dëshmitare e plagosjes së dy kalimtarëve, tregon se u shokuan nga zhurma e madhe dhe nga pamjet e rënda që panë.

“Isha te kafja lart, ishte një zhurmë e fortë, të gjithë kthyem kokën. Pashë një gocë që ishte mbuluar nga gjaku, të gjithë shkuan ta ndihmojnë. Pashë edhe një burrë të shtrirë në tokë. Ai burri ishte pa ndjenja. Më pas erdhi policia dhe ambulanca”.

Dy persona u plagosën sot në Tiranë pas rrëzimit të skelës nga një pallat në ndërtim.

Ngjarja e rëndë ndodhin në bulevardin “Gjergj Fishta”, ku si pasojë e rrëzimit të skelës u dëmtuan dy kalimtarë, shtetasi Hysen Lavdari, rreth 70 vjeç, dhe Imelda Shkembi, rreth 45 vjeçe.

Burime nga Spitali i Traumës bëjnë me dije se 70-vjeçari është në gjendje të rëndë shëndetësore, ndërsa pacientja tjetër në gjendje shëndetësore stabël dhe po mbahet në monitorim nga stafi mjekësor.