Mazhoranca socialiste ka bojkotuar mbledhjen e Komisionit për Edukimin dhe Shkencën, të thirrur sot me propozim të vetë nënkryetares socialiste Evis Kushi, duke shkaktuar reagime të forta nga opozita.
Sipas kryetarit të komisionit, Luçiano Boçi, ky veprim përbën një urdhër politik të qëllimshëm për të shmangur transparencën dhe përgjegjësinë lidhur me situatën në arsimin parauniversitar dhe përgatitjet për vitin e ri shkollor.
“Mazhoranca nuk do të përballet me pyetjet e opozitës dhe me shqetësimet reale të qytetarëve. Ata fshihen pas bojkotit, sepse nuk kanë asnjë plan real për arsimin”, deklaroi Boçi.
Mbledhja kishte për qëllim caktimin e datës dhe orës për një seancë dëgjimore me ministren e Arsimit, Mirela Kumbaro, për të diskutuar masat e marra për fillimin e vitit shkollor 2025–2026. Por, sipas Boçit, bojkotimi i sotëm dhe shmangia e ministres nga përballja me komisionin janë tregues të mungesës së transparencës dhe llogaridhënies.
Pavarësisht bojkotit, Boçi ka caktuar zyrtarisht datën e raportimit të ministres Kumbaro në Komisionin e Edukimit:
E premte, 17 tetor, ora 11:00.
Ai i bëri thirrje mazhorancës të ndalë “lojërat politike” dhe ministres së Arsimit të respektojë detyrimin kushtetues dhe institucional për të raportuar në Kuvend.
“Çdo tentativë për bojkot apo vonesë është një akt mosrespektimi ndaj Kuvendit, ndaj arsimit dhe qytetarëve shqiptarë”, përfundoi Boçi.
Discussion about this post