Delina Ibrahimaj do të vijojë të mbajë postin e ministres së Financave, ndërsa dekreti për shkarkimin e saj nga posti qeveritar nuk u votua në seancën e sotme plenare.
Shkak për këtë ngërç është bërë posti i Ervin Metes, i propozuar si ministri i ri i Financave, ndërkohë që Kuvendi votoi për shkarkimin e tij si Drejtor i Përgjithshëm të Autoritetit të Mbikëqyrjes Financiare.
Mete u shkarkua si drejtor i AMF me 95 vota pro, 1 abstenim dhe 5 kundra.
Por, Bordi i Autoritetet të Mbikqyrjes Financiare duhet të miratojë dorëheqjen e Metes si anëtar i këtij bordi, përpara se Kuvendi të shprehet për dekretin e Presidentit që e emëron ministër të Financave.
Të paktën këtë shpjegim dha deputeti socialist Eduart Shalsi, i cili në mbledhjen e Komisionit të Ekonomisë, ka sqaruar se : “si rregull Kuvendi para se të miratojë detyrën e Ervin Metes si ministër i Financave, duhet të miratojë dorëheqjen e tij nga Bordi i Autoritetit të Mbikëqyrjes Financiare dhe posti i Drejtuesit të këtij institucioni. Pra votohet vendimi për lirimin e zotit Ervin Mete. Miratohet. Zoti Erion Braçe është kundër”, tha Shalsi.
Deri në seancën e ardhës, Delina Ibrahimaj do të qëndrojë në postin e ministres së Financave në detyrë, ndërkohë që s’ka marrë ende postin e Edona Bilalit, e cila u shkarkua sot nga posti i ministres për Mbrojtjen e Sipërmarrjes.
Discussion about this post