Identifikohet edhe shpallet në kërkim autori i vendosjes së GPS-ve

Policia ka identifikuar si dhe ka shpallur në kërkim autorin e vendosjes së GPS-ve në dy makina të parkuara pranë Prokurorisë së Pogradecit.

Ai është Sidni Syzo, 28 vjeç. Syzo, u pikas nga roja i sigurisë, i cili lajmëroi policinë me frikën se autori po vendoste objekte shpërthyese poshtë automjeteve (alarm i rezultuar më pas i rremë, fatmirësisht).

Njoftimi

“Në vijim të informacionit paraprak të dhënë ditën e djeshme, për vendosjen e 2 pajisjeve GPS, në automjetet e shtetasit E. Ç., që jepeshin me qira prej tij, ju bëjmë me dije se:

Specialistët për Hetimin e Krimeve të Komisariatit të Policisë Pogradec kanë vijuar hetimet, në bashkëpunim me Prokurorinë e Pogradecit, me qëllim zbardhjen dhe dokumentimin e plotë ligjor të këtij rasti.

Në përfundim të veprimeve të para hetimore, u referuan materialet në Prokurori dhe u shpall në kërkim autori i dyshuar i këtij rasti, shtetasi Sidni Syzo, 28 vjeç, banues në Pogradec, për veprën penale “Ndërhyrje të padrejta në jetën private”.

Materialet procedurale i kaluan Prokurorisë, për veprime të mëtejshme.”, thuhet në njoftimin e policisë së Pogradecit.