Idriz Batha i ka provuar të dyja fanellat e rënda të kryeqytetit, Partizanit dhe Tiranës. Mesfushori ka fituar shumë derbi në karrierën e tij teksa tashmë është rikthyer të flas në vigjilje të përballjes më të madhe në Shqipëri duke treguar edhe pengun e tij.
“Të them të drejtën më mungon jo vetëm derbi, por më mungon futbolli shqiptar. Më mungon presioni, sepse në Shqipëri kam luajtur gjithmonë në ekipe që kanë qenë pretendente dhe kanë pasur ambicie për të fituar çdo ndeshje.
Partizani është më tepër nën presion, por historikisht kemi parë që derbi nuk ndikohet fare nga kjo pjesë. Kur vjen dita e derbit, nuk ka më presione të rezultatit. Derbi shijohet fillimisht, pastaj varet nga lojtarët, nëse ata janë gati për ta përballuar derbin. Mendoj se te Partizani këtë vit ka shumë lojtarë që e provojnë për herë të parë.
Kam luajtur shumë derbe dhe tani nuk më kujtohen. I vetmi peng i karrierës sime është që nuk kam fituar titull me Partizanin. Unë kam fituar 90 për qind të derbeve që kam luajtur, pastaj pjesa tjetër nuk më ka mbetur pishman. Sigurisht që do t’i provoja edhe humbjet, jo vetëm unë, por të gjithë. Edhe humbja ka bukurinë e vet në këtë sport”, theksoi Batha.
